TEKEK MATI ING ULONE

 Saloka

-----------

        "TEKEK MATI ING ULONE"

Kados kathah ingkang sami bingung negesi wantah Saloka menika.

Utaminipun ing tembung "Ulone".

Menawi mboten setiti, saged kisruh, brancuh nyuraos tembung

menika.

Langkung-langkung menawi pados gambar wonten Google, badhe kepanggih ingkang kaserat "ULANE", dados damel bingung ingkang kirang pirsa tegesipun.

Ulone, saking tembung lingga ; 

Ulon =  I kn (Krama Ngoko) swara (larasing wong gunêman, nêmbang). II □-□ kn: papan kang kaprênah ing êndhas, kb. dagan; kc. ulu. III (sawah) □-□ êngg. kn: sawah kang enggal kêna diêlêbi (ing mangsa rêndhêng).

Pramila "Saloka" ing nginggil mengku werdi ;

Ngati-ati yen ngendika, sisip sembire bakal aniwasi.

Ginem ingkang becik saged murakabi dhateng bebrayan agung, dene ginem ingkang nilar subasita, saged dados pradondi, kepara malah saged merjaya penjenengan pribadi.

Para Kuna ingkang sampun buntas ing saliring kawruh kathah paring pepali ingkang sanget nggegirisi kados ;

Landhepe ilat ngungkuli welat.

Landhepe lathi ngungkuli tosan aji.

Pitungkas ingkag gawat kaliwat wingit menika, boten namung ngayawara, menawi penjenengan "cobi-cobi" nerak pacak nrajang angger saged maladi (kwalat).

Pramila wonten ing Jagad nyata, punapa wonten ing ratmaya sumangga sami ngatos-atos anggenipun ngendika antawis setunggal miwah setunggalipun 

Wonten ing jagad sesrawungan, sanaosa penjenengan priyayi luhur, punjul ing apapak mrojol selane garu, nanging ampun remen maoni (padu) miwah kagungan watak sesongaran, langkung-langkung remen nyenyamah dhateng asanes kanthi mijil pangandika ingkang nilar silastuti ;

 Kowe cubluk, kowe goblog..

Sabamu kurang adoh....

Ngopimu kurang kenthel..

   Lan liya-liyane kang intine ngremehake marang liyan.

Tetembungan ingkang kados "ngendhak gunane jalma" (ngremehaken dhateng asanes), sanget kirang prayogi.

Awit menika boten namung "nyenggol rasa" nanging ugi natoni ati.

Wonten ing pupuh SINOM, anggitanipun pujangga tanah Jawa, Nate Kula waca ;

Kaluwihane sujanma

Yekti liyan kang mastani

........

Yen manungsa iku pinter, wong liya sing ngarani, ora digunggung awake dhewe.

 "TEKEK MATI ING ULONE"

Mengku werdi kang adiluhung.

Manungsa bisa Mukti utawa Mati, amarga sekang lesane (cangkeme) dhewek.

Salam taklim saking negari Walanda.